Reuniaun altu nivel prezidenti RDTL Francisco Guteres Lu-Olo ho membrus konselu superior defeza seguransa. (Foto fontes:google)
Porta voz Konselu Superior Defeza Seguransa Koronel Antonio Soares da Silva “Maucalo” iha konferensia imprenza iha Palasiu Prezidenti Nicolau Lobato kinta semana ne’e anunsia ba públiku hateten, iha loron prezidenti da repubulika DR. Francsico Guterres Lu-Olo konvoka reuniaun altu nivel konselu superior defeza siguransa hodi hatan ba proposta guvernu kona ba ezonerasaun no nomeasaun Chefi Estadu Maior Jeneral Forsas Armadas no nomeasaun ba chefias militares sira, ligadu ho karta pedidu reforma husi atual Chefi Estadu Maior Jeneral Forsas Armadas Tenenti Jeneral Lere Anan Timor. Pontus ensensiais nebe kolokadu iha reuniaun konselu superior defeza seguransa ne kompostu ;
- Aprovasaun acta reuniaun interior konselu superior defeza siguransa nian.
- Diskusaun kona ba ezonerasaun chefias militares.
- Diskusaun kona ba nomeasaun ba chefias militares.
- Diskusaun kona ba nomeasaun ka promosaun jenerais.
Koronel Maucalo isplika, konselu superior defeza seguransa nudar orgaun konsultivu nebe so bele deit fo opiniaun analítiku ba prezidenti da republika atu tetu no foti desizaun. Signifika, konselu superior defeza siguransa so bele deit fo opiniaun maibe desizaun nudar kompetensia konstitusional abasoluta iha prezidenti da republika nia liman atu disidi tuir nia kompetensia konstitusional. Koronel Maucalo rezeita revela sai materias opiniuan husi membrus iha diskusaun reuniaun konselu superior defeza siguransa nian tanba lei la autoriza. [ag]