Diretor ONG Yayasan HAK Xisto dos Santos (Foto fontes: Tempotimor.com)
DILI– Diretor ONG Yayasan HAK Xisto dos Santos iha serimonia lansamentu postu reklamasaun eleitoral iha sede ong Yayasan Hak Sesta semana ne’e ba jornalista sira hateten,
ONG HAK loke postu reklamasaun eleitoral iha Dili hodi fo advokasia ba prosesu eleisaun prezidensial liuliu akumula informasaun wainhira akontese infrasoins durante prosesu eleisaun prezidensial 2022 lao. Estabelesementu postu reklamasaun eleitoral HAK ne ho vizaun atu sukat nivel tassa partisipasaun sidadaun tomak nian. Postu reklamasaun HAK ne hamrik ho vizaun eleisaun nebe justu no demokrátiku hodi rezulta lideransa estadu kualifikadu hodi garante paz estabilidade nasaun no dezenvolvimentu nasional, ho misaun hasa’e partisipasaun sidadaun krítiku nudar instrumentu kontrolu ba prosesu eleisaun, no ho objetivu nudar fasilitador ba sidadaun hodi divulga, artikula no reklama prosesu tomak eleisaun prezidensial.
Hafoin implementasaun eleisoins sira ikus mai postu reklamasaun eleitoral HAK ne sei nakfilak ba postu popular hodi tau matan ba servisu instituisaun orgaun soberania sira nia servisu hodi garante metas moris diak ba povu.
Xisto konsidera relativu ba performa kandidatus Prezidenti da Republika nain 16 nebe’e sei involve iha kompetisaun eleisaun prezidensial, maibe nia kestiona no konsidera anomali tanba iha realidade kandidatus sira komesa ona hahú kampania maske seidauk iha anunsiu ofisial husi CNE atu hahú kampanya.
Reprezentante Secoms Asesor Secoms Carseliano Oliveira iha nia breves palavra ba lansamentu postu reklamasaun eleitoral ne husu ba jornalista sira atu ivulga informasaun eleitoral ho karakter kredibel no edukativu hodi mantein povu iha paz no estabidade durante periodu tempu eleisaun prezidensial 2022.
Enkuantu diretor adjuntu gabineti priemriru ministru ba apoiu sosiedade civil no auditoria sosial Edwin Soares Noronha hateten, lansamentu postu reklamasaun eleitoral nudar reflexu ida husi knar importante Asosiasaun HAK hodi kontribui ba posesu eleisaun ida nebe krédibel iha prosesu demokratizasaun nasaun nian. Hein katak postu reklamasaun HAK ne bele fo implikasaun pozitivu no enkoraja sidadaun hotu partisipa ativu diak liu iha prosesu demokratizasaun nasaun nian. [ag]