Ministru Prezidensia Konselu Ministru Fidelis Magalhães (Foto fontes: google)

Dili– Ministru Prezidensia Konselu Ministru Fidelis Magalhães iha konfernsia imprenza iha Palasiu Guvernu Quarta semana ne’e anunsia ba públiku hateten, konselu ministrus aprova projetu guvernu nebe aprezenta husi Ministru Ensinu Superior Siensia no Kultura Longuinhos dos Santos, kona ba alterasaun dahuluk ba dekretu guvernu nu. 2/2015, loron 14 fulan Janeiru, nebe aprova subsídiu akadémiku, bonus ba xefias no komplementu extraordenariu ba pesoal dosentes Universidade Timor Lorosa’e-UNTL. Ho aleterasaun ida ne subsídiu akadémiku no komplementu espesial ba akizisaun material téniku no sientífiku sei iha efeitu retroativu sura hahú husi loron 1 fulan Janeiru tinan 2014 hanesan ho loron hahú kálkulu bonus xefia nian.

Konselu Ministrus aprova projetu resolusaun guvernu nian ne’ebe aprezenta husi vice Primeiru Ministru no Ministru Planu Ordenamentu José Maria dos Reis nebe ninia objetu maka determinasaun ba elaborasaun planu urbanizasaun Dili nian. Planu urbabanizasaun Dili maka planu uzu rai ne’ebe defini konjuntu regra ne’ebe disiplina no orienta uzu, okupasaun no transformasaun rai urbanu sidade nian, hodi tradús objetivu prinsipiu no estratezia nebe asume husi Estadu, hodi hadi’a kualidade espasu urbanu no atu promove dezenvolvimentu funsaun no atividade urbana sira. Kria mos komisaun konsultiva ida ne’ebe kompostu husi diretor jeral sira husi departementu Guvernamental sira nebe relevante ba okupasaun no uzu teritoriu, nebe sei responsavel ba akompañamentu trabalhu elaborasaun planu urbanu no ba aprezentasaun pareser eskritu ida nebe koalia kona ba adekuasaun no konveniensia solusaun proposta sira iha planu.

Iha reuniaun ordenariu ne mos Konselu Ministrus asisti aprezentasaun husi Ministru Finansas Rui Gomes kona ba Kalendariu aprezentasaun orsamentu jeral Estadu kona ba tinan finaseiru 2023 nian. Tuir kalendariu nebe aprezenta ona, faze planeamentu nian sei hala’o iha fulan Marsu too loron 10 fulan Maio tinan 2022, Wainhira hahú faze preparasaun. Seminariu jornada orsamental sei hala’o to’o loron 30 fulan juñu tuir mai no projetu proposta lei orsamentu jeral Estadu tinan 2023 nian sei halo apresiasaun husi konselu ministrus too loron 15 fulan setembru tuir mai. Prevé katak, orsamentu jeral Estadu sei aprezenta ba Parlamentu Nasional iha loron 1 fulan Outubru tuir mai. [ag]