Prezidenti da Republika Demokrátika Timor Leste DR. Francisco Guterres Lu-Olo, (Foto fontes: Google)
Prezidenti da Republika Demokrátika Timor Leste DR. Francisco Guterres Lu-Olo, Kinta semana ne’e iha salaun auditoriu fakuldade politékniku Universidade Nasional Timor Lorosa’e Hera,halo abertura ba seminariu nasional ho tema “Refleksaun Nasional ho Espíritu Rekonsiliasaun”. Prezidenti Lu-Olo iha nia diskursu abertura foka ba importansia rekonsiliasaun lideres nasional sira no valores ukun rasik an. Prezidenti Lu-Olo hateten, Timor Leste nia ukun rasik an so iha valor wainhira povu Timor oan hotu hetan ona moris diak, moris hakmatek, moris ho paz no moris ho domin. Prezidenti Lu-Olo rekuinsese des-uniaun lideres nasionais sira sai obstákulu ba konkistas moris diak ba povu.
Tanba ne’e Prezidenti Lu-Olo husu rekonsiliasaun entre lideres nasional sira hodi ultrapasa diferensas no aposta susesu dezenvolvimentu ba povu nia moris diak. Prezidenti Lu-Olo konsidera lider nasional sira fila kotuk ba malu nudar postura partikular inklui postura pulítika ida-idak nian. Maibe liga ba interese povu no nasaun nian, Prezidenti afirma importansia rekonsiliasaun entre lideres nasional sira.
Hatan ba jornalista sira ligadu ho programas ninia kandidatura ba eleisaun prezidensial, Prezidenti Lu-Olo konfesa sei foti lisensa ferias iha loron 28 de Fevereiru hodi foka nia programas kampainha eleisaun prezidensial inklui halo grande entrevista nakloke ba públiku iha Radio televizaun Timor Leste. Prezidenti Lu-Olo alerta ba kandidatus prezidenti da republika hotu nebe sei involve kampainya eleisaun prezidnsial atu keta kahur postura propria sentimentu ba prosesu demokarsia nebe povu Timor oan hotu hakarakk atu lao ho diak. [ag]