Prezidente CNE Jose da Costa Belo (Foto fontes: google)

Dili– Komisaun Nasional Eleisoins CNE iha konferensia imprenza iha sentru mídia CNE Segunda semana ne’e deklara nakloke ba públiku balansu  kampainha eleisaun prezidensial hahú husi loron 2-14 de Marsu Segunda semana lao diak. CNE mos rekuinese akontese insidenti nebe rezulta ema mate  alende problemas infrasoins kikoan nebe inkomoda imazen no ambienti kampanha eleitoral eleisaun prezidensial 2022.

            CNE iha nia balansu ba loron 12 kampanha eleitoral ne’e rejista kazu foun balun kona ba akontesementu insidentis konfrontus ofensu corporal entre militantes no apoiantes kadidatu númeru-6 iha loron 12 de Marsu iha Baucau  nebe rezulta ema ida mate. Insidentis ne akontese ho karakter infrasaun  regras kampanha entre militantes no apoiantes husi kandidatu númeru-6 DR. Francisco Guterres Lu-Olo nian. CNE em kooperasaun ho PNTL no ekipe susesu Kandidatu Lu-Olo konsege akalma situasaun no kaptura ona autores husi insidetis konfrontus ne hodi submete ona ba investigasaun.

            CNE mos rejista infrasoins nebe komete husi kandidatus sira balun ligadu ho étika moral iha jestu no linguazen nebe ataka malu ho narasaun desorientadu ba vizaun no programas nudar kandidatu prezidenti da republika, alen de koloka insultus ba malu. CNE apela ba kandidatus sira atu evita atitude sira nebe kontradís ho lei no aproveita diak periodu tempu kampanha nebe besik ramata ona hodi foka aprezentasaun klaru lolós deit ba vizaun misaun no programas atu povu hatene.

            Tuir ajenda kampanha estabelesidus, iha loron Tersa 15 de Marsu 2022 semana ne’e CNE sei aplika debate nakloke entre kadidatus sira hodi fundamenta sira nia vizaun misaun no programas peranti públiku povu povu Timor Leste iha teritoriu nasional too diaspora. Debate nakloke ne sei hola fatin iha Hotel Timor ho kanal transmisaun direta husi  GMN-TV  ho total montante orsamentu kustu operasional rihun 12,000.00 dolares Americano ho total durasaun tempu debate minutu atus 240 ka duranti oras 4 nia laran.

            Debate nakloke ne’e sei modera husi moderador nebe hatudu ona maka Expedito Diaz Ximenes. CNE apela ba públiku povu Timor oan tomak atu akompanha didiak debate nakloke entre kandidatus sira hodi hatene lolós programas husi kandidatus sira atu  povu Timor oan hotu bele hili Timor oan ida kualidade diak ba tur iha palasiu Aitrak Laran nudar prezidenti da Republika ba Timor oan hotu. {ag}