Maria Priana Moniz de Araujo, eleitor foun (Foto; Andre Gusmão)
Maliana– Eleitor foun Maria Priana Moniz de Araujo, iha okaziaun votasaun eleisaun prezidensial tinan 2022-2027 iha sentru votasaun suco Balibo Vila, postu administrativu Balibo munisipiu Maliana Sabadu semana kotuk ba Radio Voz hateten, nudar eleitor foun nebe primeira vez eleiza diretu votasaun ba eleisaun prezidensial senti kontenti tanba nudar sidadaun Timor oan iha dever moral hodi hili prezidenti da republika 2022-2027. Maria Priana idade tinan 25 domisili aldeia Atara, suco Balibo Vila, postu administrativu Balibo munisipiu Maliana ne’e tau espetativa bot ba prezidenti foun eleitu ba mandatu tinan 2022-2027 atu tau atensaun dididak hodi rezolve problema esnsisais sira nebe povu infrenta iha nasaun laran hanesan; problema ekonomia nasaun, problema bé-mós, problema saude, problema edukasaun, estrada no problema eletrisidade.
Iha loron hanesan eleitor foun Justiliano Silva Ramos idade tinan 19, domisili aldeia Mohak, suco Leohitu, postu administrativu Balibo, munisipiu Maliana, iha sentru votasaun eskola pre-sekundaria Leohitu ba Radio Voz hato’o nia sentimentu orguilhu tanba ba dahuluk ijerse nia direitu votasaun hodi hili prezidenti da Republika iha eleisaun prezidensial 2022-2027. Justiliano alerta ba prezidenti foun eleitu atu kumpri liafuan promesa sira nebe promete ba povu iha nia kampainya dehan atu rezolve problema edukasaun, problema saude, problema bé-mós, problema estrada, no problema esnsiais sira seluk nebe liga direta ba povu nia moris loron-loron.
Nune’e mós populasaun defisienti Mateus Ximenes Carvalho, iha okaziaun votasaun eleisaun prezidensial iha sentru votasaun Suco Balibo Vila, postu administrativu Balibo, munisipiu Bobonaro Sábadu semana kotuk ba Radio Voz hateten, nudar ema defisienti nebe lei garante nia direitu senti kontenti ho antuzias hodi vota iha eleisaun prezidensial. Mateus tau espetativa boot ba prezidenti foun tenke tau atensaun ba nia direitu nudar ema defisienti, no direitu ekonomia sosiedade defisienti tomak iha nasaun laran. [ag]