Kandidatu Prezidenti Repúblika nu. 2 DR. Francisco Guterres Lú-Olo (foto: Andre Gusmão)
Kandidatu Prezidenti Repúblika nu. 2 DR. Francisco Guterres Lú-Olo hamutuk ho nia esposa Cidália Nobre Guterres Tersa semana ne’e iha oras tuku. 8:30 ejerse nia votasaun ba eleisaun Prezidensial iha sentru votasaun iha eskola ensino báziku Farol Dili. Hafoin aplika nia votasaun, kandidatu Lú-Olo koalia ba jornalista nasionais no internasionais sira hateten, iha segunda ronda eleisaun Prezidensial iha loron 19 de abril ne’e povu Timor oan hotu ba iha sentru votasaun hodi ejerse ida-idak nia direitu votasaun hodi vota ba Prezidenti Repúblika Timor Leste.
Lú-Olo konsienti nudar responsabilidade boot katak, wainhira nia re-eleitu ba Prezidenti Republika tinan 2022-2023 nia sei sai Prezidenti Repúblika ba povu Timor oan hotu no sei kumpri promesa hotu nebe nia hato’o ona ba povu duranti tempu kampaña eleisaun Prezidensial. Kandidatu Lú-Olo sente konfiavel no garantidu eleitu nudar Prezdienti Repúblika 2022-2023, maibe husik rezultadu votasaun husi povu maka determina. Lú-Olo dehan, signifikadu husi ninia votu maka sei sai Prezidenti Repúblika ba povu tomak hodi garante paz no estabilidade ba Nasaun Timor Leste, “hau nia votu, nudar votu paz no estabilidade ba povu Timor oan tomak”, nia dehan.
Lú-Olo haktuir, demokrasia ne’e katak manan kompetisaun pulítika ho dignidade, no lakon kompetisaun pulítika ho dignidade. Lú-Olo mos garante, sei kontribui nafatin ho kumprimisiu nebe nia iha ba Nasaun, se wainhira la re-eleitu ba Prezidenti Republika tinan 2022-2023.
Primeiru Minsitru RDTL Jeneral Taur Matan Ruak
Enkuantu Primeiru Minsitru RDTL Jeneral Taur Matan Ruak iha oras tuku 10:00 aplika nia votasaun iha sentru votasaun iha eskola ensino báziku Metiaut. hatan ba jornalista sira primeiru ministru hateten, nia so hatene deit buat ida katak kandidatu Lú-Olo nebe hau apoia maka manan no eleitu nudar Przidenti Republika ba tinan 2022-2023, “hau so hatene katak hau nia kandidatu nu.2 DR. Lú-Olo maka manan no eleitu nudar Prezidenti Repúblika 2022-2023”, dehan Primeiru Ministru.
Primeiru Ministru haktuir, hafoin kandidatu Lú-Olo eleitu, sei tau atensaun prioridades krítikal primeiru maka hametin estabildiade polítika guvernativa, dudu dezenvolvimentu ba oin hodi kombate kiak no mukit. Primeiru Ministru mos apela ba povu Timor oan tomak atu hafoin eleisaun prezidensial mantein hakmatek, no prepara an hodi servisu makaas liu tan, koopera ho Guvernu hodi implementa programas barak ne’ebe Guvernu prepara ona hodi hadia povu nia moris.
Husi sorin seluk Sekretariu Jeral partidu Fretilin DR. Marí Alkatiri iha sentru votasaun eskola ensino báziku Farol deklara ba jornalista sira dehan, ninia kandidatu Lú-Olo manan tiha ona. Tanba primeira ronda eleisaun prezidensial liu tiha ona, agora tama ba segunda ronda nudar pázina foun. [ag]