Kandidatu nu.2 DR. Francisco Guterres Lú-Olo (Foto fontes: google)
Dili— Kandidatu nu.2 DR. Francisco Guterres Lú-Olo Sesta semana ne’e deklara nakloke ba mundu tomak katak nia aseita no simu rezultadu Eleisaun prezidensial no nia simu lakon iha eleisaun Prezidensial Timor Leste 2022 iha loron Tersa 19 de Abril. Kandidatu Lú-Olo mos ho fuan boot halo ona kontaktu komunikasaun no hato’o ona nia kongratulasaun ba kandidatu nu.2 DR. José Ramos Horta ne’ebe eleitu nudar Prezidenti Repúblika tinan 2022-2027, “nudar kandidatu no nudar Prezidenti repúblika hau deklara simu rezultadu eleisaun Prezidensial no hau apela ba povu Timor oan tomak atu simu rezultadu eleisaun prezidensial 19 de Abril 2022 ho laran hakmatek no haksolok iha paz no estabilidade, no hasa’e moris diak ba ema hotu no hametin justisa sosial”, dehan Lú-Olo iha konferensia imprenza iha sede kandidatu hotel Lux Clarita Sesta semana ne’e.
Lú-Olo hato’o nia agradesementu ba partidu Fretilin ne’ebe depozita konfiansa ba nia hodi avansa nudar kadidatu Prezidenti no agradese ba partidu apoiantes Lux Verde sira PLP, KHUNTO, Frenti Mudansa, PUDD no organizasaun hotu ne’ebe fo apoia pulítika ba nia kandidatura iha eleisaun prezidensial 2022. Lú-Olo mos hato’o agradesementu ba kualidade servisu diak orgauns eleitorais CNE no STAE duranti prosesu tomak eleisaun Prezidensial 2022 lao.
Lú-Olo mos hato’o nia agradesementu ba knar instituisaun siguransa Estadu nian Pulísia Nasional Timor Leste PNTL no orgaun judisiária Estadu nian Tribunal Rekursu, ne’ebe fo ona prestasaun servisu diak durante prosesu tomak eleisaun prezidensial 2022. Lú-Olo konfirma, nia parte mos komunika ona no hato’o ona kongratulasaun ba kandidatu nu.1 DR. Ramos Horta ne’ebe hetan konfiansa votus barak liu no eleitu nudar Prezidenti Repúblika Timor Leste 2022-2027. [ag]