DR. José Ramos Horta Prezidenti Repúblika períodu mandatu 2022-2027.
Dili—Kandidatu nu.1 DR. José Ramos Horta eleitu ba Prezidenti Repúblika períodu mandatu 2022-2027. Tuir rezultadu final provezoriu, kandidatu Ramos Horta konkista viotóra ho votus 62,09%.
Dadus husi kontazen Sekretariadu Tékniku Administrasaun Eleitoral STAE ne’ebe konklui iha oras 24 nia laran nebe divulga sai husi Lusa kuarta 20/4, konfirma kandidatu Ramos Horta hetan votus rihun 397.145 ka 62,09%, kontra kandidatu Lú-Olo nebe hetan votus rihun 242.440, ka 37,91% iha segunda volta eleisaun Prezidensial. Enkuantu Comisaun Nasional Eleisoins CNE seidauk bele pronunsia kompozisaun númeru votus difinitivu provezóriu nebe kandidatu rua hetan tanba tenke hein barrera tempu ikus prosedementu legais eleitoral determina.
Prezidenti CNE Jose Agostino Belo iha konferensia imprenza kinta semana ne’e konfirma ba jornalistas sira dehan, CNE so bele fo sai rezultadu difinitivu provezóriu iha loron Sesta 22/4 semana ne’e, “CNE iha tempu legal oras 72 atu halo apuramentu, halo verifikasaun no delibera akta rezultadu molok pronunsia rezultadu difinitivu provezóriu”, dehan prezidenti CNE. Hafoin ne, CNE sei fo tan tempu durante oras 24 ba kandidatu rua atu aprezenta rekursu, antes CNE entrega rezultadu difinitivu provezóriu ba Tribunal rekursu atu legaliza ka valida ba rezultadu difinitivu final.
Enkuantu Primeiru ministru RDTL Jeneral Taur Matan Ruak Kinta semana ne’e iha palasio Prezidenti Nicolau Lobato deklara kongratusaun Guvernu ba povu Timor oan hotu nebe fo ona kontribuisaun ba prosesu eleisaun segunda volta nebe lao diak, no disidi ona Prezidenti Repúblika Timor Leste ba periodu mandatu 2022-2027, Guvenu mos kongratula Prezidenti Repúblika eleitu Jose Ramos Horta.
Hafoin prosesu kontazen númeru votus maioria aponta ona ba vitória kandidatu Ramos Horta, Guvernu Hahú preparativus ba serimonia tomada de posse Prezidenti Repúblika eleitu Jose Ramos Horta. Guvernu mos hare hela hodi identifika baenaka altu nivel internasional sira nebe dispunivel atu partisipa iha serimonia tomada de posse Prezidenti Repúblika Timor Leste ba periodu 2022-2027, ne’ebe tuir planu serimonia tomada de posse sei hala’o iha resinto monumentu uma kultura Tasitolu.
Preokupasaun kona ba aplikasaun tomada de posse ba Prezidenti Repúblika eleitu ne’ebe sei ezekuta husi Prezidenti Parlamentu Nasional liga ho retórika pulítika Prezidenti Eleitu Jose Ramos Horta iha kampainya ne’ebe hakarak desolve Parlamentu Nasional, Primeiru Ministru dehan, konfrontasaun pulítika iha faze kampaña liu tiha ona, no rezultadu eleisaun difini klaru ona Prezidenti Repúblika eleitu, agora tama iha faze koalia kona ba tomada de posse ba Prezidenti Repúblika eleitu, katak koalia kona ba Estadu. [ag]