Prezidente eleitu DR. José Ramos Horta (foto: Wikipedia)
Radio Voz Dili–Hafoin rezultadu eleisaun prezidensial konfirmadu husi Comisaun Nasionl Eleisaoins CNE, Prezidente eleitu DR. Ramos Horta Quarta semana ne’e hasoru malu formalmente dala primeiru ho Prezidenti Republika DR. Francisco Guterres Lú-Olo, ho intensaun atu aprezenta ninia kumprimentu ba Prezidenti Repúblika Francisco Guterres Lú-Olo, no ho objetivu atu hare prosesu tranzisaun hand over kargo Prezidenti Repúblika iha serimonia loron 19 no 20 de Maiu 2022 atu lao diak ho dignidade hodi dignidade Estadu.
Ramos Horta sublina, oras ne’e dadaun prosesu ba serimonia hand over kargo Prezidenti Repúblika lao dadaun husi ekipa Prezidensia no Ministeriu Estatal ho entidades relevantes sira ne’ebe lao diak no laiha difikuldades. Ramos Horta aprezenta ninia admirasaun no respeitu ba Prezidenti Lú-Olo no nia husu ba Prezidenti Lu-Olo atu konta ho ninia kontribuisaun nudar xefi Estadu no nudar individual wainhira Lú-Olo ramata mandatu no sai ona Prezidenti sesante.
Ramos Horta promete sei konsulta ho Prezidenti Repúblika DR. Lu-Olo wainhira sai ona sesante kona ba kestoins nasional no internasionais. Ramos Horta mos husu Prezidenti Repúblika Francisco Guterres Lú-Olo nia tulun ba nia planu diálogu ho lideres nasional sira no partidu sira iha Parlamentu Nasional hodi hakle’an demokrasia, hodi book ekonomia nasaun bele lao diak ba oin, tanba tinan lima mai oin Nasaun sei infrenta dezafiu bot iha áreas barak inkluindu área ekonomia nudar seitor importante ba Nasaun. Ramos Horta isplika, Maske nudar knar Guvernu nian, waihira Nasaun infrenta ona krize iha seitor ekonómia no seitor importante sira seluk maka Prezidenti repúblika iha dever moral atu suporta Guvernu hodi hetan solusaun.
Ramos Horta konfessa hahú kontaktu dadaun ona ho lideres nasional sira hahú husi Prezidenti Repúnlika Francisco Guterres Lu-Olo, Xanana Gusmão, no mos elementus balun Guvernu nian, atu aleinde halo prosesu trazisaun hand over kargo Prezidenti Republika iha loron 19 no 20 de maio la’o ho diak, mos atu haré oinsa modelu Guvernu ida diak no forte liu hodi fo resposta ba dezafius nasional no dezafius internasional ne’ebe Nasaun infrenta. Ramos Horta mos konfirma ba jornalista sira katak, Prezidenti Parlamentu Nasional atual Aniceto Guterres maka sei prezidi serimonia tomada de posse ba Prezidenti Repúblika foun iha loron 19 no 20 de maiu 2022.
Kona ba bainaka xefi Estadus nasoins estranjeirus sira nebe sei partisipa iha serimonia tomada de posse Prezidenti Repúblika foun iha loron 19 no 20 de Maiu, Ramos Horta dehan, nudar kompetensia Prezidenti Repúlika atual DR. Francisco Guterres Lú-Olo maka hato’o konvite, enkuantu nudar individu nia rasik kontaktu ona ho entidades reprezentativu mundial sira atu partisipa iha serimonia ninia tomada de posse nudar Prezidenti Repúblika iha loron 19 no 20 de Maiu 2022. [ag]