Francisco Guterres Lú Olo, Prezidente RDTL
Meskita, Kampu Alor, 2 maiu 2022
Kompatriota musulmanu sira
Liuhusi mensájen ida ne’e ha’u hakarak saúda kompatriota musulmanu sira hotu, iha Timor-Leste no iha rai-liur, ne’ebé selebra Idul Fitri hamutuk, hafoin tuir faze Ramadhan ho ritual jejun durante fulan ida.
Maluk musulmanu sira selebra loron ohin ho laran moos tanba fase ona sala, perdoa malu ona, halo ona rekonsiliasaun nu’udar família no nu’udar komunidade.
Ho selebrasaun ida ne’e, família uma laran haklean nafatin sira nia domin no respeitu ba malu. Tanba ne’e, importante tebes ba Timor-Leste valoriza loron Idul Fitri.
Ha’u aproveita loron espesiál ohin atu husu dala ida tan ba sidadã no sidadaun ida-idak, atu fó liman ba malu, nu’udar timoroan, no tanen hamutuk prinsípiu no valór sira ne’ebé hametin ita nu’udar Povu ida de’it, moris iha uma lisan boot ida de’it: Timor-Leste!
Iha loron 19 maiu tuir mai, ha’ u sei ramata ha’u nia mandatu nu’udar Prezidente Repúblika maibé sei la hakotu ha’u nia misaun nu’udar servidór Nasaun no Povu Timor-Leste. Hamutuk nafatin ho kompatriota ida-idak, tuir kbiit no matenek ida-idak nian, ita hotu sei fó liman ba malu hodi hametin ita-nia Estadu Direitu Demokrátiku, kuda pás no estabilidade, dezenvove ita-nia rai doben no hasa’e moris-di’ak ba Povu tomak.
Hako’ak boot espesiál ba komunidade musulmana iha Timor-Leste no mós iha Indonézia no rai sira seluk.
Obrigadu.
Francisco Guterres Lú Olo
Prezidente RDTL