Radio Voz Dili— Hahú husi tinan 2021 oitavu Guvernu konstitusional aloka ona orsamentu ketak ba komunidade relijiaun Musulmanu rihun 500.00 dolares Americano kada tinan. Asessor prinsipal Primeiru Ministru, no pontu vocal gabineti Primeiru Ministru ba apoiu sosiedade sivil DR. Filipe da Costa iha nia intervensaun iha serimonia selebrasaun loron bo’ot Idul Fitri iha Masjid An-Nur kampung Alor Segunda semana ne’e hato’o ba komunidade Musulmanu katak, sidadaun hotu iha Nasaun Demokrátiku Timor Leste tenke hetan benefisiu husi apoiu Guvernu RDTL.
Apoiu ba ema hotu liu-liu komundiade relijiozu importante tanba atu sai sidadaun diak tenke sai uluk relijiozu diak, no relijozu diak maka hatene halo tuir doutrina relijiaun rasik, maibe atu hetan doutrina diak nebe asesivel, presiza apoiu meius no fasilidade. Asesor Filipe apela komunidade Musulmanu tomak atu alen de haksolok festeiza manan selebrasaun Idul Fitri 1443 Hisjriah, mantein doutrina diak sira atu sai komunidade Musulmanu kualidade diak iha Nasaun Timor Leste.
Asosor Filipe husu ba lideransa no komunidade Musulmanu atu bele tradús apoiu Guvernu ba medidas sira doutrina nian nebe forma komunidade Musulmanu ida nebe kualidade diak.Sidadaun diak hatene hadomi nia rai no reza ba Guvernu no Nasaun, ba sistema demokrasia Nasaun, no tulun Guvernu atu bele implementa programa sira ho diak, no mantein Nasaun iha estabilidade, paz no toleransia.
Vice Prezidenti konselu nasional Islámika Timor Leste Abdulah Ináçio Antonio Soares hateten, selebrasaun loron Idul Fitri 1443 Hijriah tinan ne’e koloka tema universal “transforma moral komunidade Musulmanu” atu komunidade Musulmanu tenke riku ho moral nebe kualidade diak. Abdullah Ináçio konfessa, selebrasaun loron bot Islam Idul Fitri 1443 Hijriah tinan ne’e komunidade Musulmanu Timor Leste aleinde hetan apoiu orsamentu mos hetan karaun rua husi Guvernu.
Abdullah Ináçio rekuinese komunidade Musulmanu Timor Leste orguillu tebes bele sente duni demokrasia hodi ijerse nia direitu liberdade relijiaun livremente iha Nasaun RDTL, Abdullah Ináçio apela ba komunidade Musulmanu Timor Leste atu mantein moris iha paz dame no harmonia iha Nasaun doben Timor Leste. [ag]