Diskursu Sua Eselénsia Primeiru-Ministru Taur Matan Ruak
Serimónia lansamentu Fatuk Dahuluk nian ba Konstrusaun Timor Marina Square
Lecidere, loron 17 fulan-maiu tinan 2022
Exelentísimu Senhor Ministru Koordenadór Asuntus Ekonómikus (MKAE), Sr. Joaquim Amaral
Exelentísimu Membru sira Governu Konstitusionál VIII
Exelentísimas Senhoras no Exelentísimos Senhores husi Korpu Diplomátiku no Ajénsia Internasionál sira ne’ebé akreditada iha Timor-Leste
Exelentísimu Senhor Diretór Ezekutivu TradeInvest Timor-Leste I.P., Sr. Arcanjo da Silva
Exelentísimu Senhor CEO husi Empreza “A-Smart Holdings Ltd”, Sr. Liam Huan Chiang
Exelentísimu Senhor Reprezentante no Funsionáriu sira Empreza Timor Marina Square S.A nian
Senhoras no Senhores,
Distintus Konvidadus
Governu Konstitusionál VIII define ona hanesan prioridade hodi diversifika ekonomia, liuliu hodi promove inisiativa sira ne’ebé enkoraja no estimula kreximentu setór produtivu nian sira ne’ebé konsidera hanesan estratéjiku sira ba dezenvolvimentu nasionál nian, hanesan Turizmu, Agrikultura no Indústria sira ne’ebé transforma rekursu naturál no petrolíferu sira.
Konsagra mós nu’udar objetivu nasionál ne’ebé boot, hodi hamenus dependénsia ne’ebé demaziadu liu ba reseita sira Fundu Petróleu nian, nomos atu hamenus neineik pezu setór públiku nian iha ekonomia, liuhusi reforsu investimentu no inisiativa privada nian.
Tanba ne’e, ho ksolok no satisfasaun boot, ohin loron ha’u partisipa iha Serimónia Lansamentu Fatuk Dahuluk nian ba Konstrusaun Timor Marina Square, ne’ebé konkretiza prioridade sira nasaun nian iha prátika no iha posibilidade hodi kumpre objetivu nasionál sira ida ne’ebé boot, ho projetu privadu ida, ne’ebé finansia husi fundu internasionál sira ne’ebé posibilita aparesimentu operadór ekonómiku foun ida iha setór Turizmu nian.
Serimónia ida ne’ebé marka inísiu husi prosesu ida ba reabilitasaun urbana ne’ebé sei hala’o iha área importante ida-ne’e iha Largo Lecidere, ho infraestrutura foun ida ne’ebé moderna, efisiente, sustentavel iha nivel ekonómiku no ambientál, ne’ebé sei disponibiliza la’ós ba de’it servisu foun sira ba ita-nia sidadaun, turista, investidór no emprezáriu sira ne’ebé vizita ita, liuhusi otél, restaurante, estabelesimentu komersiál no apartamentu sira, maibé mós oferta oteleira sira nasaun nian ne’ebé di’ak no kualidade servisu nian sira ne’ebé fó ba ita-nia utente sira.
Projetu ida ne’ebé marka ritmu kreximentu no progresu nian ne’ebé ita dezeja ba nasaun, ho inovasaun barak liu, kriatividade barak liu, empreendedorizmu privadu barak liu, hodi estimula aparesimentu jerasaun trabalhadór foun ida ne’ebé kualifikadu no operadór ekonómiku sira.
Investimentu ida ne’ebé kontribui duni ba objetivu boot sira Governu nian no ne’ebé mak ezije husi ita-nia sidadaun sira, liu-liu joven sira, ne’ebé buka oportunidade foun sira kona-ba formasaun no empregu nian, ne’ebé bele hasae ninia abilitasaun no kompeténsia sira, nomos fonte sira rendimentu nian, moris-di’ak no kualidade moris nian.
Senhoras no Senhores
Distintus Konvidadus
Kompleksu Timor Marina Square reprezenta kreximentu no modernu ne’ebé ita hakarak tebes ba ita-nia nasaun!
Investimentu ida ne’ebé ho dolar Amerikanu Millaun 50, eskluzivamente privadu, investe ona iha ita-nia rain, ne’ebé hatudu kompromisu no konfiansa husi investidór externu sira, ba ita-nia futuru ne’ebé koletivu.
Timor-Leste nasaun ida ne’ebé akolhedór, seguru no pasífiku ho oferta sira diferente no potensialidade sira iha setór turizmu, agrikultura, peska, indústria, komérsiu no servisu nian sira, ne’ebé sei fó benefísiu ba komunidade ho prezensa hosi polu foun ida-ne’e ba dezenvolvimentu urbanu.
Ho inisiativa ida-ne’e sei kria 170 empregu imediatu diretu, ne’ebé sei realiza obra sira konstrusaun nian. Tuirmai, durante faze operasionál sei kria empregu 250 ne’ebé liga diretamente ba projetu.
Ita fiar katak ho prezensa infraestrutura ida-ne’e iha Lecidere, Dili, sei loke oportunidade foun empregu no negósiu nian sira, hodi hamosu vaga sira atus ba atus iha servisu sira apoiu nian, iha transporte, iha komérsiu, iha lojístika no iha servisu tékniku-finanseiru sira.
Oportunidade foun sira ba formasaun no kapasitasaun institusionál, ne’ebé hodi uza prátika sira ne’ebé di’ak liu ba atendimentu no servisu internasionál sira, sei hasa’e padraun no nivel kualidade nian iha oferta indústria oteleira Timor-Leste nian.
Tanba ne’e, ha’u hakarak agradese ba Reprezentante husi Empreza Timor Marina Square S.A., no ba CEO hosi Empreza “A-Smart Holdings Ltd”, Exelentísimu Sr. Liam Huan Chiang, ba investimentu ne’ebé realiza iha Timor-Leste no iha Timoroan sira, hodi renova ita-nia disponibilidade atu kontinua servisu hamutuk hodi konkretiza projetu ida-ne’e no projetu investimentu nian sira seluk.
Agradese mós ba koordenasaun investimentu nian ne’ebé realiza hosi Sua Exelénsia Ministru Koordenadór Asuntus Ekonómikus (MKAE), nomos servisu sira ne’ebé hala’o husi funsionáriu, tékniku no espesialista sira, ho supervizaun hosi Ajénsia TradeInvest Timor-Leste I.P.
Ikusliu, hakarak transmite ha’u-nia apresu ba hotu-hotu ne’ebé kontribui ona ba konkretizasaun hosi investimentu ida-ne’e, ne’ebé onra tebes no hana’i ita.
Parabéns ba ita hotu ba lansamentu fatuk dahuluk husi kompleksu ne’ebé sei sai Hotel, komérsiu no Apartamentu sira Timor Marina Square nian.
Maromak haraik bénsaun ba ita.
Obrigadu barak!