Prezidente-da-Repúblika Francisco Guterres Lú Olo
PREZIDENTE-da-REPÚBLIKA PROMULGA ORSAMENTU JERÁL ESTADU RETIFIKATIVU 2022
Palásiu Prezidensiál Nicolau Lobato, 18 maiu 2022
Prezidente-da-Repúblika Francisco Guterres Lú Olo, ohin, promulga Dekretu Parlamentu Nasionál Lei númeru 62/V-alterasaun dahuluk ba Lei númeru 1/2022, 3 janeiru kona-ba Orsamentu Jerál Estadu ba 2022 no kriasaun Fundu Kombatentens Libertasaun Nasionál.
Orsamentu Jerál Estadu ba tinan-2022 aprovadu ho Lei númeru/2022, 3 janeiru. Maibé haree ba situasaun ekonómika internasionál no aumentu substansiál tasa inflasaun nian, sai nesesáriu ba estadu foti medidas hamenus impaktu ekonómiku hodi antisipa liuhusi dotasaun orsamental atu finansia sasukat sira.
Reseitas konsolidadas husi Setór Públiku Administrativu hahú sae ba US $ 3,100, 688,695. Despeza orgaun servisus no Administrasaun Sentral sae ba US $3,100,688,695.
Orsamentu Jerál Estadu Rektifikativu ba tinan-2022 fahe tuir klasifikasaun ekonómika hanesan tuirmai ne’e: US $250.537.130 ba Saláriu no Vensimentu, US $467.077.382 ba Bens e Servisu, US $1.950.982.687 ba Transferénsia Públika, US $41.914.097 ba Kapitál Menor no US $390.177.399 ba Kapitál Dezenvolvimentu.
Bazeia Lei ne’e, durante tinan-2022, Governu autorizadu bele foti transferénsia husi Fundu Petrolíferu to’o montante US $ 2.552.598.015.
Lei ne’e harii Fundu ba Kombatentes Libertasaun Nasionál ho finalidade financia programa apoiu ba Kombatentes Libertasaun Nasionál iha área sosial, edukasaun, saúde, empregu, asesu ba kréditu no atividade ne’ebé manán rendimentu.
Lei Orsamentu Jerál Estadu Retifikativu ba tinan-2022 aprova iha Parlamentu Nasionál iha 11 maiu 2022.
MÍDIA PR.