Xefi Bankada Partidu Demokrátiku Antonio da Conceição (Fontes foto: Parlamento.tl)
Dili— Xefi Bankada Partidu Demokrátiku Antonio da Conceição iha plenaria Parlamentu Nasional Segunda semana ne’e aprezenta nia observasaun krítiku konsidera serimonia investidura ka tomada de posse Prezidente repúblika Eleitu iha loron 19 de Maiu kalan iha Tasitolu hatun dignidade Estadu, tanba laiha orientasaun klara kona ba orariu no lalaok programas aleinde la reflete protokolu karater formalidade sesaun solene.
Tuir pontu de vista deputadau Antonio, serimonia tomada de posse Prezidente Repúblika eleitu halo baenaka altu nivel Estadu no Guvernu Nasaun Estanjeirus sira konfuzaun no desorientadu tanba lahatene limiti sesaun karater protokolu formal ba pontu krítiku hanesan sesaun solene aktu tomada de posse Prezidente Repúblika eleitu nudar pontu programa esensial. No nia kestiona tanba tempu barak liu husi serimonia reflete kuaze improvizasaun maka barak demais no dominante barak liu husi divertimentu.
Deputadu Antonio da Conceição mós foka observasaun nia krítiku ba lalaok serimina komemorasaun tinan 20 restaurasaun independensia iha loron 20 de maiu iha Palasiu Prezidente Nicolau Lobato, nebe nia konsidera komisaun organizadora laiha kapasidade tékniku hodi hatur pontus programas tuir kontestu serimonia selene nebe partisipa prezensialmente husi baenaka altu nivel Estadu no Guvernu nasoins estranjeirus sira. No nia konsidera entidades organizador serimonia tomada de posse Prezidente Repúblika eleitu iha Tasitolu 19 de Maiu kalan no komemorasaun tinan 20 independensia 20 de Maio iha Palasiu Prezidensial fraku demais no laiha responsabilidade.
Deputadu Antonio mos foka espesífikamente nia krítika ba autor aprezentador programa ka master cerimoniy (MC) nebe laiha kapasidade tanba lahatene hatur materia komentarius liuliu iha faze programas krítiku hanesan hasa’e Bandeira. Deputadu Antonio husu Parlamentu Nasional no Guvenru tenke hanoin didiak kona ba estabelsementu protokolu Estadu iha serimonia tomada de posse Prezidente Repúblika iha loron 19 de Maiu kalan no serimonia komemorasaun restaurasaun independensia iha futuru.
Hatan ba kestaun ne’e Ministru Asuntus Parlamentar no Komunikasaun Sosial Francisco Jerónimo promete sei hato’o ba Guvernu atu hanoin prosesa lalais lei protokolu ba serimonia ofisial Estadu, atu labele akontese tan falhansu iha serimonia ofisial Estadu nian iha futuru mai.
Enkuantu Prezidente Parlamentu Nasional Aniceto Guterres iha nia resposta hateten, frakezas husi serimonya tomada de posse Prezidente Repúblika nebe akontese tanba falhansu iha kordenasaun entre Parlamentu Nasional ho Prezidente Eleitu no ho Guvernu. Tanba ne’e Prezidinte Parlmentu Nasional husu ba Guvernu ho Parlamentu Nasional no Prezidensia Repúblika atu tenke hadia ba futuru liu husi estabelesementu lei protokolu Estadu. [ag]