Prezidente Repúblika Demokrátika Timor Leste DR. Ramos Horta
Dili –Prezidente Repúblika Demokrátika Timor Leste DR. Ramos Horta iha okaziaun konferensia Nasional “asaun koletivu dezenvolve ekonomia matak ba Timor Leste” iha salaun auditóriu Universidade Nasional Timor Lorosae Hera Kuarta semana ne’e ba jornalista sira hateten, thema konferensia nebe organiza husi fakuldade agrikultura peska no siensias marinas iha âmbitu loron mundial meiu ambienti Oceanos 8 de Juiñu diak hodi konsiensializa sosiedade tomak salva natureza meiu âmbiente Nasaun no kontribui ba ijieni ambiental mundu.
Parte rua importante nebe sosiedade tenke tau matan maka proteze floresta ka ailaran no proteze aihoris no proteze bé-matan sira iha rai maran, labele tesi ai arbiru, labele soe lixu arbiru iha mota laran. Lixu kontinua nakonu iha tasi ibun no tasi laran tanba komunidade barak nebe hela iha mota ninin laiha edukasaun moral diak no soe foer arbiru ba mota laran, wainhira udan tun dudu lixu barak ba para hotu iha tasi ibun no tama ba tasi laran oho mate ikan no ahu ruin sira iha tasi laran.
Prezidente Repúblika apela ba entidades estudantes universitariu no sekundariu tomak atu organiza asaun ezemplar no mobiliza sosiedade prevene soe lixu arbiru no ivolve hamoós lixu nebe nakonu iha tasi ibun iha sidade kapital Dili no iha Nasaun laran tomak. Prezidente apela Guvernu intervein ho kampaiña persistente aplika pulítika insentivu ba komunidade ezemplar ijieni ambiental, aplika pulítika sansaun ba komunidade violador regra ijieni ambiental, alen de mos promove valor salariu autoridade komunitariu sira.
Hatan ba apelu Prezidente Repúblika ne Reitor Universidade Nasional Timor Lorosae João Martins konfirma prontidaun UNTL, no liu husi senadu universitariu UNTL sei organiza grupu ijieni ambiental tasi no grupu ijieni ambiental rai maran hodi aplika asaun konkreto ba protesaun ijieni ambiental Nasaun laran. Atu materializa apelu husi Prezidente Repúblika relasiona ho importansia ijieni ambiental ne’e, antes estudantes UNTL mobiliza kolaborasaun sosiedade jeral, internalmente UNTL presiza mobiliza uluk an rasik hodi hatudu uluk ezemplu konkreto iha prátika prevensaun ijieni ambiental ba sosiedade em jeral. [ag]