Prezidenti Repúblika Demokrátika Timor Leste DR. Ramos Horta

Dili– Prezidenti Repúblika Demokrátika Timor Leste DR. Ramos Horta iha okaziaun eventu enkontru anual parseiru dezenvolvimentu TLDPM iha edifisiu Ministeriu Finansas Sesta semana ne’e ba jornalista sira hateten, situasaun real povu labarik kosok oan no inan sira nian iha nasaun laran moris susar tebes no presiza  intervensaun efetivu husi Guvernu.  Prezidenti Horta rekuinese Guvernu integra preokupasaun hirak ne’e iha programa orsamentu Estadu retifikativu tinan 2023. No wainhira mekanizmu Guvernu no parseiru dezenvolvimentu hamutuk ho seitor privadu tomak iha kolaborasaun diak, no iha ambienti pulítiku favoravel maka ekonomia Nasaun bele rekupera iha periodu tempu sira mai, apezar dezafius bot covid-19 nebe  seidauk ramata  no funu iha Ukraina fo impaktu ba mundu tomak no posivelmente bele akontese resesaun ekonómia global nebe bele atinji to’o Timor Leste.

Prezidenti Horta alerta lideransa pulítiku Timor oan sira atu tenke iha kolaborasaun diak hodi hamenus impaktu husi resesaun ekonomia global nebe Banco Mundial rasik mos rekuinese. Prezidenti Ramos Horta haré ona mekanízmu finanseirus nebe Guvernu aprezenta iha orsamentu jeral Estadu retifikativu 2023 nebe kontempla  medidas imediata ba situasaun real ekonomia povu, hanesan hasa’e subsídiu osan ba ferik katuas ba  dolares Americano 50, fo subsídiu familiar dolares Americano 200 iha kada fulan dezembru, maske laos solusaun efetivu ba tempu naruk, sai ona solusaun hodi tulun povu iha situasaun difisil.

Prezidenti alerta tan, bainhira pandemia Covid-19 sei ijisti iha mundu, no funu iha Ukraina sei kontinua maka Nasaun sei infrenta nafatin dezafiu boot. Tuir espektasaun prezidenti Repúblika, infrenta  dezefiu boot husi ameasa resesaun ekonómia global ne’e wainhira Guvernu konsege hasa’e kresementu ekonónia Nasaun ba %2 deit mos diak ona. [ag]