Konseleiru Komisariu Konselu Imprenza Timor Leste no orador Otélio Ote ( Foto: André Gusmão)
Dili– Konseleiru Komisariu Konselu Imprenza Timor Leste no orador Otélio Ote iha okaziaun Eventu sensibilizasaun literasia dijital iha salaun auditóriu Eskola Colégio Paulu VI Segunda semana ne’e ba Radio Voz hateten, Knar Konselu Imprenza nian atu asegura kontén publikasaun mídia komunikasaun sosial no mídia sosial tenke hatudu lian lós, no labele divulga hoax ka informasaun falsu.
Tanba ne’e jornalista no estudantes operador mídia sosial sira tenke hatene hatur pozisaun iha separasaun jornalizmu mídia komunikasaun sosial ho mídia sosial nebe tenke hato’o informasaun tebes no lós. Jornalista mídia komunikasaun sosial no operador mídia sosial sira mos tenke iha kapasidade linguazen jornalístiku no hatene hatur estrutura liafuan nudar fator esensial no xavi ikus liu nebe klareza ho lolós no momós sentidu informasaun.
Otélio Ote mós fo hanoin ba jornalista no operador mídia sosial tenke hatene uza asimilasaun lígua (kahur lian) wainhira infrenta difikuldades liafuan balun nebe lian Tetun laiha. No tenke hatene signifikadu sinais no kolokasaun sinais iha letra no paragrafo eskritura sira hanesan pontu, vírgula, assentu, entre aspas, sujetu no objetu, hodi garante uniforme sentidu nutisia entre intensaun nutisia jornalista ho saida maka hakerek no signifikadu saida maka públiku kumprinde husi nutisia ida. [ag]