Prezidenti Konselu Administrasaun Televizaun Grupu Mídia Nasional GMN-TV.Sa. George Serrano (Foto: André Gusmão)
Dili– Prezidenti Konselu Administrasaun Televizaun Grupu Mídia Nasional GMN-TV.Sa. George Serrano iha nia intervensaun ba eventu komemorasaun aniversariu GMN-TV ba tinan-lima iha hotel El-Legendares Kuarta kalan semana ne’e hateten, ejistensia GMN-TV durante tinan-lima infrenta situasaun todan nebe implika husi impasse pulítika guvernasaun no pandemia global Covid-19 iha Nasaun laran. Durante viazen, GMN-TV hetan apoiu husi entidades titulares Nasional sira, no tanba hetan konfiansa hsui sosiedade. George Serrano rekuinesse duranti tinan-lima ijistensia GMN-TV seidauk konsege halo buat hotu, maske kontribui ona buat balun ba dezenvolvimentu Nasaun.
Prezensa GMN laos afavor no opozisaun ba entidades pulítiku ruma maibe atu kontribui ba Estadu atu divulga informasaun lós no kredibel no ho programas barak nebe bele tulun lider Estadu sira hodi rezolve problema nebe sosiedade Nasaun infrenta. GMN-TV lamosu atu halo kompetisaun, maibe atu kompleta malu ho mídia sira seluk hodi kontribui ba dezenvolvimentu Estadu de direitu demkrátiku.
George Serrano konsidera GMN-TV sai nudar universidade aberta ba sosiedade públiku Nasional no mundu, nebe dezafia kualifikasaun autor jornalizmu televizaun tenke matenek liu sosiedade públiku hodi oferese perkursu publikasaun kredibel ba konsumu sosiedade públiku. George Serrano rekuinesse GMN-TV sei asumi frakezas ruma tanba Estadu no Nasaun foin tinan-20 restaurasaun independensia sei infrenta hela limitasoins problema no frakezas barak, no husu diskulpa nakloke ba sosiedade telespetadores públiku karik duranti tinan-5 ijistensia GMN-TV iha públikasaun ruma la konvense espatativa sosiedade públiku.
Prezidenti RDTL DR.Ramos Horta
Enkuantu Prezidenti RDTL DR.Ramos Horta iha nia intervensaun kongratula emprezariu George Serrano no ba tinan-lima GMN-TV no ba susesu jornalista no funsionarius tomak GMN nian iha tinan-lima nia laran. Prezidenti Repúblika rekuinsse laos fasil atu dezenvolve mídia komunikasaun sosial liu-liu televizaun iha mundu tomak. Prezidenti Repúblika konfessa durante ne’e nia akompainia ho admirasaun ba servisu mídia televizaun Nasional tomak, no husu ba GMN-TV atu susesu liutan ho prestasaun servisu diak liu tan ba sosiedade públiku iha tinan sira futuru mai. [ag]