Porta Voz komando jeral Instituisaun F-FDTL Kapitaun José Antonio Nunez da Costa.

Dili– Iha loron Segunda feira 5 de Setembru iha oras 17:30 akontese konfrontus krimi massal husi grupu joventude lubun boot iha estrada públiku hahú kedas husi kruzamentu lampu sinais hospital nasional Guido Valadares kobre diresaun tomak estrada públiku sentru loja negósiu avenida Jacinto Cándido.
Polísia buka tuir ona autor involvidus sira no kaptura ona balun hodi submete ba prosesu investigasaun no hasoru prosesu justisa.Komando F-FDTL seidauk divulga espesifikamente dadus autor, vítima no estragus ba mídia tanba investigasaun sei la’o hela seidauk to’o iha kokluzaun difinitivu.
Porta Voz komando jeral Instituisaun F-FDTL Kapitaun José Antonio Nunez da Costa iha konferensia imprensa iha salaun auditoriu Quartel Jeneral F-FDTL Tersa semana ne’e anunsia ba públiku katak, akontesimentu frefere afeta elementu forsa F-FDTL ida husi komponente naval primeiru sarjentu Joanico Batista kona tuda kanek sériu iha nia ulun no parte nia isin balun, no submete hela tratamentu iha hospital nasional Guido Valadares.
Komando jeral F-FDTL mos seidauk bele fó informasaun espesífiku kona ba autores involvidus no estragus husi

konfrontu massal refere tanba investigasaun sei la’o hela. Maske nune’e, faktualmente hatudu ona vítima nain rua mate no nain ida kanek nudar implikasaun husi konfrontus krimi massal refere. Komando Jeral F-FDTL apela ba elementus forsa hotu husi komponenti tomak atu mantein disiplina no kumpri misaun tuir orden komando.
Komando F-FDTL mos apela ba entidades hotu lideres komunitariu atu mantein populasaun kontribui ba estabilidade no siguransa nasional nasaun. Komando mos husu ba lideres organizasaun arte marsiais hotu atu aplika atividades tuir regulamentu legal, no domina ida-idak nia elementus hodi evita perturbasaun ba siguransa no estabilidade nasaun, atu povu hela hakmatek hala’o atividades vida moris loron-loron. [ag]