Konsilleiru Konselu Imprensa Timor Leste Francisco Simões Belo.
Dili– Konsilleiru Konselu Imprensa Timor Leste Francisco Simões Belo iha nia intevensaun abertura ba forum editorial fulan outubru 2022 iha salaun restaurante Golden Star Tersa semana ne’e hateten, Parlamentu Nasional aprova ona no Prezidente Repúblika promulga ona loron 16 de Outubru nudar loron nasional liberdade imprensa. Estadu disidi loron 16 de Outubru nudar loron liberdade imprensa kona los ho loron jornalista nain lima nia mate iha loron 16 outubru iha sentru postu administrativu Balibo nebe kuinesidu ho “Balibo Five”.
Konselu Imprensa sei organiza eventu lansamentu loron nasional liberdade imprensa 16 de Outubru dala ida hamutuk ho komemorasaun loron “Balibo Five” jornalista nain lima nia mate iha Balibo. Prezidente Repúblika DR. Ramos Horta Sei fo abertura ba eventu ne’e, no sei marka prezensa husi entidades altu nivel orgaun soberania Estadu nian hanesan Prezidente Parlamentu Nasional, primeiru minsitru, no guvernantes asuntus komunikasaun osisial, aleinde mos marka prezensa husi entidades korpus diplomátiku nasoins estranjeirus jornalista onravel internasional sira husi nasoins estranjeirus.
Konselu Imprensa sei mobiliza instituisaun mídia komunikasaun sosial, asosiasaun jornalista no jornalista sira atu involve iha eventu selebrasaun ne’e konsentra iha sentru postu administrativu Balibo munisipiu Bobonaro durante loron hat hahú husi loron 14-17 de Outubru 2022.
Diretor Diresaun Komunikasaun Sosial no Relasaun Institusionais no Kooperasaun Konselu Imprensa Altino da Cruz Freitas aprezenta sekuensias programas iha eventu ne’e, sei akumula atividades hirak hanesan; Limpeza jeral hamutuk ho komunidade, feira te’in produtu lokal komunidade Balibo ba konsumu enventu, exibisaun foto jornalístiku, debates ka diskusaun televizivu Prezidente Repúblika, diskursus husi altas entidades Estadu nian, programa café dader, forum editorial dezenvolvimentu mídia iha Timor Leste, komemorasaun trazédia Balibo 16 de Outubru jornalista nain lima nia mate, lansamentu loron nasional liberdade imprensa no atribuisaun prémiu ba jornalista no instituisaun mídia komunikasaun sosial. [ag]