Prezidente Repúblika Demokrátika Timor Leste DR. José Ramos Horta.
Dili– Prezidente Repúblika Demokrátika Timor Leste DR. José Ramos Horta hateten, graduasaun Universitariu nudar momentu importante ba familia no estudantes graduadus sira, maibe dezafius boot ba Guvernu no seitor privadu tenke prepara opurtunidade vaga ba kolokasaun graduadus sira. Prezidente Repúblika dehan, graduadu sira mos tenke reflete kualidade matenek iha sira nia kakutak, tanba graduasaun ne reflete kualidade diak, no diploma ne koresponde ba matenek iha graduadus sira nia kakutak ne diak ba Nasaun. “Maibe wainhira diploma lakoresponde ba kualidade matenek iha sira nia kakutak, maka gruduadus sira ne lakon tempu deit, tanba wainhira ba buka servisu ema laharé deit ba diploma maibe haré liu kualidade servisu”, Prezidente Ramos Horta hateten ida ne ba jornalista sira iha serimonia graduasaun Universidade Dili ba dala-10 iha salaun Mahoka kuarta semana ne’e.
Enkuantu Prezidente fundasaun UNDIL Estevão Belo hateten, graduasaun nudar faze normal nebe akontese iha Universidade hotu iha kada tinan. Enkuantu kolokasaun vagas ba graduadus la’os problema Universidade nian maibe nudar problema graduadus sira nian. Prezidente fundaaun UNDIL hein estudantes finalistas nain 672, no após graduasaun 11 husi fakuldade ekonomia, fakuldade direitu, fakuldade Enjineria, fakuldade saude, no fakuldade edukasaun, nebe simu graduasaun ne bele uza siensia nebe sira simu hodi bele kompete iha vaga servisu.
Nia mos konfirma, 60% husi númeru total graduadus sira ne servisu tiha ona, enkuantu so 40% maka seidauk servisu. [ag]