Vice Ministra Solidaridade Sosial no Inkluzaun Signi Verdial. (Foto: André Gusmão)

Dili– Vice Ministra Solidaridade Sosial no Inkluzaun Signi Verdial hateten, MSSI seidauk disidi data fiksu atu halo pagamentu ba umakain reklamante subsídiu $.200 fim do ano.

“Seidauk iha data fiksu atu halo pagamentu ba uma kain familia reklamantes subsídiu $.200 fim do ano,  maibe entre semana ida ou rua nia laran bele ona halo pagamentu, presiza tempu tanba tékniku MSSI presiza haré no reverifika didiak dadus balun nebe akontese duplikasaun, no halo kordenasaun ho ministeriu ESTATAL hodi afiksa dadus númeru reklamante tuir númeru nebe aprovadu iha konselu ministrus 8.812 maka sei simu pagamentu subsídiu $.200 fim do ano, no total orsamentu pagamentu ba reklamantes nebe aprovadu husi konselu ministrus maka hamutuk millioins 2.3 dolares Americano “, Signi dehan.

Nia husu ba populasaun umakain benefisiáriu sira atu hakmatek hodi hein prosesu husi MSSI hodi to’o ba pagamentu.

“Inan aman sira, maluk sira husi munisipiu, postu administrativu, sukus no aldeias sira to’o iha áreas rurais, benefisiáriu sira,  ita bot sira hakmatek, fo tempu uitoan ba tékniku MSSI sira halo servisu, imi nia lista reklamasaun nebe ami simu husi ESTATAL por volta de 8.812, maioria iha Dili  1.200, iha munisipiu seluk balun 100, balun 200 no balun 300, hakmatek ba hodi simu imi nia osan wainhira tékniku sira finaliza ona prosesu verifikasaun dadus”, vice ministra Signi Verdial ko’alia ida ne’e ba jornalista sira iha Parlamentu Nasional Segunda semana ne’e. (ag)