‘Nunee Hau dehan ba o katak nia hetan perdua ona ba ninia sala barak, tanba nia hatudu domin boot.’ Lukas 7:47
Loron ida, Jesus han hela iha Simao nia uma, ema farizeu ida, kuandu feto-aat ida tama. ‘Nia hamriik iha Jesus nia ain iha kotuk. Nia komesa habokon Jesus nia ain ho ninia matan been, no nia hamaran Jesus nia ain ho ninia fuuk. Depois nia rei no fui mina morin ba Jesus nia ain. Bainhira ema Farizeu nebee konvida Jesus haree buat nee, nia hanoin iha nia laran, “Se Mane nee mak profeta ida, Nia sei hatene kona ba feto nee see nebee kona hela Nia. Tanba feto nee mak sala nain ida.’ (Lukas 7: 38-39) Maibe Simão komprende sala. Laos katak Jesus la hatene , maibé Nia la preokupa ba ida ne’e! Iha loron neeba, Jesus fó perdua ba ninia sala no lori nia ba dalan salvasaun no restaurasaun.
Istoria ne’e konfirma buat ne’ebé ita hatene ona: Jesus mai atu salva ema sala-na’in sira iha dalan no ema laran-makerek sira iha igreja. La iha ema ida mak sees husi Ninia grasa. Hodi lembra ba ida ne’e, hanoin took kona ba buat ne’e:
(1) Nunka haluha Maromak salva imi husi saida! Haree to’ok buat ne’ebé Jesus hatete ba Simao ema Farizeu: ‘Nunee Hau dehan ba o katak nia hetan perdua ona ba ninia sala barak, tanba nia hatudu domin boot.’(Lukas 7:47) David hanoin-hetan ninia sala sira iha tempu uluk, no hakerek: ‘Nia foti sae hau hosi rai kuak nebee estraga, hosi tahu fatin nebee belit, no Nia tau hau nia ain iha fatuk ida, no halo metin hau nia lao fatin. Nia foo kanta foun iha hau nia ibun laran, hodi hahii ita nia Maromak; ema barak sei haree no sai tauk, depois sira sei fiar ba NAI.’ (Salmo 40: 2 – 3)
(2) Hanoin-hetan katak Jesus la hare ba imi nia passadu, maibé ba imi-nia futuru. Ema-barak haree feto ne’e hanesan du’ut-fuik, maibé Jesus haree feto ne’e hanesan aifunan rosas, no Nia rega. Principal mak: Se imi presiza perdua ohin, mai hasoru Jesus. No se imi hetan ona perdua, fó sai imi-nia laran ba Nia ho hahi’i.
Aihan Espiritual: Atos 2:1-21, Joel 2:23-32