Prezidente Repúblika Demokrátika Timor Leste DR. José Ramos Horta iha serimonia tomada de posse komandante Jeral PNTL no celebrasaun aniversáriu PNTL ba dala 23 iha edifísiu komando unidade polícia UEP.
Dili– Prezidente Repúblika Demokrátika Timor Leste DR. José Ramos Horta iha serimonia tomada de posse komandante Jeral PNTL no celebrasaun aniversáriu PNTL ba dala 23 iha edifísiu komando unidade polícia UEP Segunda semana ne’e fo posse ba komisáriu Henrique da Costa nudar komandante jeral PNTL, no komisariu Pedro Belo nudar II komandante jeral PNTL ba mandadu tinan 2023-2026.
Prezidente Ramos Horta iha nia diskursu hateten, Polícia Nacional Timor Leste halo ona tinan 23, bainhira ita selebra instituisaun ruma ita halo selebrasaun ho festa, maibe ita tenke halo mos refleksaun ba progresu instituisaun Estadu nian nebe durante ne’e la’o.
“Hanesan Prezidente Repúblika ou Guvernu halo diskursu refleksaun sobre Estadu ka Nasaun, ita haré progresu nebé iha ita hametin liu tan, maibe ita buka mos identifika dezafius, hadi’a buat nebé halo sala, halo inovasaun maibe realista no labele promete barak, sukat didiak Timor Leste nia produtu internu brutu, nia kapasidade finanseira, no pergunta ba buat nebe ita mehi, buat nebe ita propoin sustentavel ka lae, labele halo promesas oin-oin ke lareflete ita nia realidade ekonómika”,Prezidente dehan.
Xefi Estadu hatete, dalan nebe PNTL la’o iha tinan 23 nia laran, la’os fasil iha nia dezenvolvimentu institusional no operasional, nia kontribuisaun diak ba defeza legalidade demokrátika nasional, garantia siguransa ba ema no ema nia propriedade, defeza ba direitu sidadaun sira hotu.
“Maibe ita hatene dalan ida ne la’os tetuk los deit, ita hotu testemuñu rasik iha tinan sira nia laran iha chokes grave, iha hakiduk, moris lubuk ida lakon, hau rejista kriasaun departamentu formasaun nebé tuir estratezia pulítika kualifikasaun rekursus umanus iha PNTL nebé fo todan ba sentru formasaun Polícia ba unidade espesial sira no ba funsaun atu asegura nia implementasaun ho kordenasaun metin, hau fo parabens ba nivel kuinesementu ba medidas prioritária nebe foin dadaun halo atu kanaliza investimentu liu tan ba formasaun espesializada ba membru forsa polisial”, Prezidente sublina.
Prezidente Ramos Horta elojia progressu husi dedikasaun lubuk nebe instituisaun PNTL konsege to’o ohin loron, inklui adoptasaun lei orgánika nebe viabiliza promusaun ba igualidade jéneru iha instituisaun PNTL laran nebé loke opurtunidade hanesan ba forsa PNTL feto no mane iha direitu hanesan ba nivel diviza hotu to’o iha nivel diviza komando.
“Parabens mos ba lei orgánika nebe foin dadaun adopta nebé tuir estratézia ida atu halo promusaun ba igualdiade jéneru ladiskriminasaun iha PNTL nia laran, no né signifika mos iha pozisaun komando, no labele buat sira ita halo hanesan dala ruma halo simbóliku deit, ita tenke halo ivestimentu bot liu la’os deit iha PNTL maibe iha instituisaoins hotu Estadu nian tenke iha investimentu ka promusaun igualidade jéneru iha nivel diviza hotu. Hau hakarak fo sai hau nia rekuinesementu ba esforsu sakrefísiu ke lor-loron imi halo iha kumprimentu imi nia missaun, maske iha difikuldades dezafius oioin, imi buka sempre halo imi nia missaun ho integridade no ho entrega an total”, prezidente Horta revela.
Prezidente Ramos Horta alerta prontidaun komando jeral PNTL foun atu prepara an hodi infrenta prosesu eleitoral eleisaun parlamentar tinan 2023 nebe fase inísiu komesa hahú dadaun ona, ba-sá partidu pulítiku sira hahú dadaun konsolidasaun ka primeira faze kampainã eleitoral.
“Ita atu ramata ona lejislatura ida ne, no vida prátika VIII Guvernu mos atu ramata ona, primeira faze kampaiña eleitoral hahú dadaun ona ke partidu pulítiku sira bolu konsolidasaun, hau bolu ne primeira faze kampaiña eleitoral, sira bolu konsolidasaun. Prezidensia sei akompaiña rekoilla informasaun kona ba prosesu sira ne, maibe papel sentral importante pertense ba CNE ho komando operasional PNTL nian, pertense ba observadores sira, Prezidensia Repúblika sei akompaiña iha munisípiu sira hotu servisu nebe elementus CNE-STAE, instituisaun defeza-siguransa, Guvernu no partidu pulítiku sira halo, hau nia intensaun atu kontribui deit ba transparensia integridade ejersísiu eleitoral para ita bele hakle’an ita nia demokrasia”, dehan Prezidente.
Prezidente Ramos Horta revela nia votus sussesu ba komandante jeral PNTL Henrique da Costa no II komandante jeral PNTL Pedro Belo bele ijerse didiak sira nia knaar komando PNTL nebe Estadu entrega ba sira hodi garante nafatin Nasaun mantein iha siguransa, paz no estabildiade. Prezidente mos agradese ba dedikasaun tomak husi komandante jeral PNTL sesante Faustino da Costa no Mateus Fernandes nebe asegura siguransa, paz no estabildidade Nasaun mai to’o ohin loron.
“Ohin ita fo posse no tau testemuñu ba komandante jeral PNTL Henrique da Costa no II komandante jeral PNTL Pedro Belo, hau aprezenta hau nia votus ho fuan no laran, bele kaer imi nia knaar ida nebe todan, Estadu entrega ba imi ho prinsipiu no valor sira hanesan disiplina, onra no dever lor-loron iha tiha imi nia kakutak imi nia fuan, imi nia kuríkulu akadémiku profisoinal, nia istória servisu públiku ne’e hanesan promessa garantia, imi hatene kaer instituisaun ida ne ho valor ás teb-tebes, ho apártidarizmu pulítiku. Imi sei kontinua halo esforsu mai husi antessesória sira hotu iha imi nia kotuk iha luta kontra infiltrasaun krimi organizada iha railaran ida ne’e, iha tempu badak hau hakarak halo diálogu ho komando foun. Ba komandante sessante Fasutino da Costa no Mateus Fernandes, agradesementu ba imi nia servisu ba Nasaun, servisu todan durante krize bot ke rai Timor Leste infrenta liu-liu krize pulítika, inundasoins no pandemia covid-19 nebe mai, hau akompaña imi nia servisu, ba hotu-hotu, ba forsa sira, hakoak bot, obrigadu no sussesu”, dehan Prezidnte Ramos Horta iha rohan nia diskursu. [ag]