Prezidente Repúblika Demokrátika Timor Leste DR. José Ramos Horta.
Dili— Prezidente Repúblika Demokrátika Timor Leste DR. José Ramos Horta iha nia diskursu ba selebrasaun restaurasaun independensia RDTL ba tinan 21 iha Palácio Prezidensial Sábadu 20/5/2023 hateten, povu eleitor hotu uza ida-idak nia kartaun eleitoral ijerse direitu vota iha eleisaun parlamentar 2023, vota tuir ida-idak nia direitu, no mos nudar obrigasaun moral sidadaun. Xefi Estadu parabeniza instituisaun eleitoral CNE-STAE sira nia misaun nebe servisu ho profesionalizmu ezekuta prossesu eleitoral ho lais, no agradese ba forsa F-FDTL no PNTL nia servisu nebe ijerse funsaun ho neutralidade hodi garante siguransa no estabilidade Nasaun iha prosesu eleitoral, no felista autoridade municipal to’o lideres komuniatriu sira nia servisu iha prossesu eleitoral ida ne.
“Povu eleitor ida-idak nebe iha kartaun eleitoral atu ijerse, atu ba vota tuir imi nia direita, ita nia direitu, no mos obrigasaun moral nudar sidadaun, hau fo parabems ba instituisaun eleitoral CNE-STAE ho sira nia missaun, oinsa sira servisu lais ho profesionalizmu ezekuta prossesu eleitoral. Hau felisita no parabems ba Pulícia Nacional PNTL haré sira ijerse funsaun ho imparsialidade hanesan sira halo durante tempu kampaña eleitoral tomak. Nune’e mos hau felisita forsas armadas F-FDTL nebe fo sira nia apoiu ba PNTL garante ona siguransa, hau fo parabens ba autoridade municipiu sira, nai xefi sukus, nai xefis aldeias, imi maka iha liña oin loron-loron halo jestaun atividades iha area rural, iha bairo capital”, Prezidente dehan.
Prezidente Ramos Horta mos agradese ba kontribuisaun produtivu no efetivu husi sistema Nasoins Unidas ho velosidade tempu lais loke dalan ba realizasaun prossesu demokrátika eleitoral Timor Leste, alende mos agradese ba nasaun sira hotu nebe simu Timor oan sira hodi ijerse direitu aktu eleitoral iha nasaun estranjeirus.
“Agradese ba sistema Nasoins Unidas liu-liu ba PNUD nia kontribuisaun ténika iha tempu lais efisiente ho laran luak nebe loke dalan ba prossesu realizasaun prossesu demokrátika eleitoral, ba nasaun internacional sira nebe simu ita nia oan sira, hau agradese ba komunidade sira iha nebá nebe partisipa iha ita nia aktu ejersísiu eleitoral ida ne’e”, Prezidente Horta hateten.
Prezidente Repúblika felisita ho votus susesu ba partidus pulítiku konkorentes eleisaun parlamentar 2023, no dehan, sei iha selebarsaun festa manán, mos karik sei iha tristeza ruma, demokrasia nuné’e duni, maibe vida no nasaun kontinua nafatin, nasaun presiza ita hotu, laiha selebrasaun festa manán, no labele iha partidus pulítiku nebe sente lakon ka derrotadu, so iha deit selebrasaun demokrasia.
“Ba partidus pulítiku sira hotu nebé rejistadu iha eleisaun parlamentar 2023, hau aprezenta hau nia votus susesu, sei iha festa, sei selebrasões manán, maibe sei iha karik tristeza ruma, demokrasia nune’e duni, maibe vida kontinua nafatin, nasaun kontinua, dezafius bot teb-tebes, opurtunidade mos bot teb-tebes. Nasaun presiza ita hotu, sei laiha elementus ka grupu nebe hateten derrotadu, iha deit maka selebrasaun demokrasia, demokrasia jovem, dinámika no iha abut ona iha kultura identidade Timor nian”, Dehan Prezidente Horta iha fraze ikus nia diskursu. [ag]